అమెరికాలో రూ.కోటి.. భారత్‌లో రూ.25 లక్షల జీతం.. ఎక్కడ ఎక్కువ పొదుపు చేయొచ్చు? ఎన్‌ఆర్‌ఐ ఆసక్తికర లెక్కలు!

అమెరికాలో ఏడాదికి దాదాపు రూ.1 కోటి సంపాదిస్తున్న ఓ భారతీయుడు.. ఇండియాలో రూ.25 లక్షల వార్షిక వేతనం ఉన్నప్పుడే తాను ఎక్కువ డబ్బు ఆదా చేసేవాడినని చెప్పడం సోషల్‌ మీడియాలో చర్చకు దారితీసింది. 15 ఏళ్లుగా అమెరికాలో ఉంటున్న నితిన్‌ మల్హోత్రా తన ఆదాయం, ఖర్చుల వివరాలను వీడియోలో పంచుకున్నారు.

నితిన్‌ మల్హోత్రా ప్రకారం.. అమెరికాలో నెలకు సుమారు 8,000 డాలర్లు (రూ.7.63 లక్షలు) సంపాదిస్తున్నారు. ఇందులో దాదాపు 2,500 డాలర్లు లోన్‌కు, మరో 1,500 డాలర్లు పన్నులకు వెళ్తున్నాయి. దీంతో చేతిలో సుమారు 4,000 డాలర్లు మిగులుతున్నాయి.

జీతం భారీగానే ఉన్నా..
రెండు కార్లకు ఇన్సూరెన్స్‌ కోసం నెలకు సుమారు 500 డాలర్లు, తనకు, భార్యకు, కుమారుడికి ఆరోగ్య బీమా కోసం మరో 500 డాలర్లు ఖర్చవుతున్నాయని నితిన్‌ తెలిపారు. కుటుంబ ఆహార ఖర్చులు నెలకు 1,000 నుంచి 1,200 డాలర్ల వరకు ఉంటాయని చెప్పారు.

మెడికల్‌ బిల్లులు, మందులు తదితర ఇతర ఖర్చులకు మరో 500 నుంచి 800 డాలర్లు వెచ్చిస్తున్నట్లు తెలిపారు. ఫోన్‌, ఇంటర్నెట్‌ బిల్లులు కూడా చెల్లించాల్సి ఉంటుంది. వీటన్నింటినీ కలిపిన తర్వాత నెలకు తనకు సుమారు 1,000 నుంచి 1,200 డాలర్లు మాత్రమే మిగులుతున్నాయని చెప్పారు.

భార్య ప్రస్తుతం ఉద్యోగం చేయడం లేదని, ఆమె ఉద్యోగంలో చేరితే పిల్లల డేకేర్‌ తదితర ఖర్చులు కూడా అదనంగా వస్తాయని నితిన్‌ పేర్కొన్నారు.

ఇండియాలో ఎంత ఆదా చేశారంటే?
అమెరికాతో పోలిస్తే ఇండియాలో తన ఆర్థిక పరిస్థితి మెరుగ్గా ఉండేదని నితిన్‌ చెప్పారు. భారత్‌లో ఏడాదికి సుమారు రూ.25 లక్షల వేతనం పొందుతున్న సమయంలో నెలకు రూ.30 వేల వరకు అద్దె చెల్లించేవాడినని తెలిపారు.

రోజువారీ ఖర్చులు కూడా అమెరికాతో పోలిస్తే తక్కువగా ఉండటంతో నెలకు రూ.1 లక్ష నుంచి రూ.1.25 లక్షల వరకు సులభంగా ఆదా చేసేవాడినని ఆయన చెప్పారు.

దీంతో అమెరికాలో ఎక్కువ జీతం వస్తున్నప్పటికీ.. అధిక జీవన వ్యయం కారణంగా చేతిలో మిగిలే మొత్తం భారత్‌లో కంటే తక్కువగా ఉందన్నది ఆయన వాదన.

అమెరికాలో జీతం ఎక్కువ.. కానీ
నితిన్‌ వ్యాఖ్యలపై నెటిజన్లు భిన్నాభిప్రాయాలు వ్యక్తం చేశారు. అమెరికాలో జీవన ప్రమాణాలు, మౌలిక వసతులు, అత్యవసర సేవలు మెరుగ్గా ఉన్నప్పటికీ.. ఉద్యోగం కోల్పోతే పరిస్థితి కష్టంగా మారుతుందని ఓ వ్యక్తి వ్యాఖ్యానించారు.

మరో నెటిజన్‌ మాత్రం భార్య కూడా ఉద్యోగం చేస్తే కుటుంబం మరింత ఎక్కువగా ఆదా చేయగలదని అభిప్రాయపడ్డారు.